Latest News & Information.
Back to the main News and Photo's page
2 November 2007
"Ou te mana'o ia ola si o'u afafine"...Mikaele Nanai
by: Ame Sene - Le Samoa Post Newspaper (Lomiga aso 30 Oketopa 2007)
E fa aso o fa'aonea si o'u afafine i le falemai o tamaiti i Motootua. Fai mai teine fomai o loo faatonu mai e le fomai e 'aua le fafagaina lo'u afafine. O le faamatalaga a le tama ia Mikaele Nanai, 26 tausaga o Falelatai, faapea na ola lona to'alua i le Aso Toonai, ona ave lea o lona afafine ua tuu i le potu o pepe ma le faatonuga e aua ne'i fafagaina. E faapea lava la ia, ai pe na'o sina taimi peitai, e oo atu lava i le Aso Lua o le isi vaiaso o loo minoinoi mai lava lona afafine i le pusa o loo tuu ai.
O lana vaai ua matua mana'omia lava e lona afafine se suasusu, ma alu ai loa fa'atiga susu o lona to'alua ae maua ai le suasusu ma alu ave fa'anana i le pepe. Na fesoasoani i ai se tasi o tamaitai fomai i lea faiga, e ui ina i ai foi le popolega o lea teine tausi ma'i, e tusa o le molimau a Mikaele.
E talitonu Mikaele o le tulaga lea na fa'aonea ai lona afafine i le falemai, ua mananao lava le falemai e oti, ae meamanu lava e oti ai pe 'ana le mata'alia i le fafagaina faamalosi. O le talitonuga a le fomai na i ai, lea na talanoa i matua o le pepe o Miracle, faapea e le umi se taimi e ola ai, pe le atoa foi se vaiaso.
SESE FOMA'I INA UA SILIA LE VAIASO O OLA PEA MIRACLETINA
Na o faamalosi lava i tua matua o Miracle ma ave le pepe, "ona ua na o le taotooto lava i le falemai e leai ni suesuega pe o ni togafitiga foi o faia i ai, i a latou faamatalaga. "E foliga mai ua na o le faatalitali oti le mea na fai i le falemai o pepe i Motootua.
I le faamatalaga a le tina o Mikaele, "e leai ma se mafua'aga e ala ai ona nonofo umi i le falemai ae leai se galuega a le falemai o faia i le pepe, o le ala foi lea na ou loto ai foi e ave le latou pepe i le fale. Ae o le taimi foi lea ua faaopoopo ane lava teine tausi mai ua lagolagoina le fafaga o Miracle i le falemai, ma fautuaina ai loa e faatau se apa susu, e fafaga ai, ma toa'aga e tausi ma faamama."
TETE'E LE FOMAI A TAMAITI I LE FAAONEA O MIRACLE
E leai se talitonuga o le fomai o tamaiti na tupu sea tulaga o le fa'aonea o le pepe i le falemai. Ona o so'o se tamaititi lava e fanau mai e manava ma ola, e fafaga ma faia tui puipuia pei ona masani ai. E ui ina e na o le aso lava na fanau ai le pepe na vaai ai e le fomai a tamaiti pei ona ia faamatala, ae talitonu o ia, e leai se tulaga faapea na tupu i le pepe o le fa'aonea.
E atoa le vaiaso o i ai lava le pepe i le falemai, ae o le molimau a lona tina, e leai foi ni tui puipui na faia i le taimi na fanau ai.
TALIA E LE FOMAI A TAMAITI LE TOE VAAI I LE PEPE
Ua savali i le lua masina le matua o Miracle ae o lo'o o la pea e augapiu ma se tausiga fa'apitoa pe o se togafitiga foi ua faia i ona foliga. O le umi foi lea e le'i vaai se fomai ia Miracle, ae na faate'ia ina ua taunuu le talosaga mai le sui o le Survival Foundation, i se fesoasoani mo le soifua maloloina o pepe, ae le gata ai o le talosagaina faapitoa e tagataga'i i se taotoga faapitoa e togafiti ai ona foliga pe a talafeagai ai.
O le faalapotopotoga a le Survival Foundation na faavae mai i le tusa o le sefulu tausaga talu ai, faapitoa lava mo le tali atu i fanau ma aiga o lo'o taotaomia i le lima vaivai ma le le tagolima. Ua tele ni tamaiti ua fa'a-ao'oga aemaise aiga o lo'o i lalo o le vaaiga a le Faalapotopotoga. O le amataga o le tausaga nei na tuuina atu ai le fanua e tusa o le tasi le eka lea o lo'o i Vaitele e le Malo mo le Faalapotopotoga, e faafoe ai ana galuega.
E LE UMI ONA OLA MIRACLE
O le talitonuga lava lea e tasi o le foma'i a tamaiti na tali ane ai i le talosaga, peitai, sa valuvalusia pea a'a o le fau mo se fesoasoani, e lelei lava le tupu ane o ni pefea, ae ua faia i ai se fesoasoani. O le vaiaso nei (Le Samoa Post Newspaper -Issue - Lomiga aso 30 Oketopa 2007) lea ua talia e toe vaai ai Miracle e le fomai a tamaiti i Motootua. I se talanoaga fa'asamasamanoa a lea fomai ma le sui o le Survival Foundation, na atagia ai le la'ititi o le faamoemoe e umi ona ola le pepe, ona e tele lava ni mafua'aga na fa'amalaulau e le fomai, e aofia ai "le la'ititi o le fai'ai ma le avanoa o lo'o i lona tuasivi e so'ota'i atu i le fai'ai" E talitonu le fomai, e faigata lava ona faia se ta'otoga, ona e tatau ona faia muamua ni su'esu'ega pe gafatia e le tino o le pepe le malosi o le vai gase ma isi togafitiga e faia ia te ia. Ae o le a se'i vaai pea i ai i le taimi e taunuu atu ai le pepe i le falemai.
TALITONU LE AFIOGA I LE PALEMIA E MAFAI ONA FAIA SE TAOTOGA FAAPITOA MO MIRACLE
E na o le ata o le pepe na ave ma matamata i ai le afioga i le Palemia, lea na ia saunoa "e matua fiu e mafai ona faia se taotoga o le pepe."
O se fa'amalosi'au fo'i lea i le taumafaiga o lo'o faia nei, e sailia ai se fesoasoani mo le toe togafitia o foliga o Miracle. O lo'o galulue nei le pulega a le polokalame TV Samoa faapea le nusipepa a le Le Samoa Post i Niu Sila, mo le tuufaatasia o se fesoasoani mo Miracle.